Juchhuuu!!!  Es ies erreicht: „Schöne neue Welt“ (Huxley) und „Big Brother is Watching You!“ (Orwell) seind ålte Hiat. „Fahrenheit 451“ (Bradbury) werd aa båld ieberholt sein. Die Utopie werd von da Realität eingholt und sugår ieberholt. Seit heit‘ gültet bei uns im furtschrittlichn Österreich die VDS (Vorrats-Daten-Speicherung).

Jedes Telefongespräch, jede SMS, jede Mail und a jeder Internetzuagriff werd fier 6 Monat gspeichert. Ålle åchtmülliohnen Österreicher stehn åb sufurt unta Terrorvadåcht. Weil es könntet jå aana drunta sein der a Terrorist ies und so bleed ies, dass er von seina eigenen Internetadress oda von sein Vertrågshändi (und niet von an anonymen Wertkårtnhändy aus) Terrorpläne bekånnt gibt.

Und die Suachmaschiehnen laafn haaß und durchsuachn ållas wås gschriebm und ångsurft werd, ob då valleicht iergendawo a Wurt wia „eisBOMBE“ vurkummt, oda ob da Kuhle bei sein Kruschpln wieda amål a „geschmåcksEXPLOSION“ håt, oda ob er bei kålte Fiaß es Gurgln miet Ha-zwei-O-zwei (weil des ies Rackettntreibstoff) empfühlt. Und wenn da Ruflo beim Sörfn niet aufpasst, kånns basieren, dass schon kurze Zeit späta die Bullezei mit Håndschölln oda eligdrohnische Fuaßfessln vur seina Tier steht und sågt „Åb in den Tschumpus!“ Weil de Herrschåftn derfn natierliech åb safurt ååållas sehgn und lesn wås unseraana von siech gibt oda siech im Netz ånschaugt. Natierliech lei in begriendete Felle (hihi, lol, rofl – i kriag mi niamma – und dås bei uns in da Panahnenrebuplick Eestarreich, wo aa Hånd die åndare wåscht).

Und mei Händi låss i dahaam aufm Schreibtiesch. Maanst valleicht, i bien niet bleed, dass i mi ieberållhien vafolgn låss, und a Eggsekuhta waaß, wohien i meine Schwårzgölda trågn tua?

Jå, heit‘ ies da erste Aprüll – åba des wås i då obm gschriebm håb, ies KEIN Aprüllscherz nicht, des ies Tåtsåch. Und niet eppa in an totalitärn Überwåchungsstååt, naa, bei uns im gimiatliechn Österreich.

I brauch heit ka Fruahstieck mehr, mir ies so schon iebl ginua. Und wås fier aan großkopfertn Möchtegern-Butentatn i es näxte Mål wähln werd‘ – i waaß es niet.
Und  eigntliech ies es eh Wurscht, weil es gültet da ilegtrische Leitsåtz "Ihr da OHM macht WATT ihr VOLT"
___________________________________________________

An guatn Morgen Eich ålln und an scheenen Pålmsunntåg wientscht Eich da Pålmesl ausm Gebirge.