|
|
|
| ruflo am 25.12.2010 10:50 (vua 5445 Tåg) |
Kuhle, es Kriestkindle ies jå eh ållaweil a Flåtterweible und kaa Mannkale. Oda kånnst Du Dir vurstölln aan so aan hååriegn Lootta in an Nåchtpfoadlen, miet Fliegalan, und wumäglich an Pårt der von Haus zu Haus flåttert und die Kienderlen bischähren tuat? I niiiiianiet. Hihi, des taatet scheen bleed ausschaugn.
25.12.2010 10:54:Bei uns ies aa niex vom Kristpaam åba gfålln fier die Sally, niet amål da gånze Paam ies umgfålln. Åba es Huntale håt eeh bei da Pischährung aa a Packale kriagt, miet lauta Friessalien drien. Niex zum Lesn odaso, weil die Sally ies leida a Annalfabett.
Und gibrunnen håt da Paam aa niet, lei a diecke Kierzn miet dem Friednsliacht aus Pettleheem.
|
| ruflo am 25.12.2010 10:42 (vua 5445 Tåg) |
Jå, wår scheen gestern, wieda amål miet ålle Kinderlen, Schwiegakienda und Enkalan beinånder sein. Gfajat håmma nåachan mier Draje - es Mietzale, die Sally und i - allan dahaam. Gånz ohne Komm Butter, lei a biessale Fernsähn miet teilweis scheena Musieck im Päckgraund und an Haufen Viecherlen auf Gut Aiderbichl. Scheen stiell und ruhig hålt.
Und die Sally håt aa in da Heilign Nåcht niex xågg, wia iemma hålt, weil de ies gånz a leisiger Tüpp.
Heit håmma schon - z'erst bei leichtn Regn, nåachan bei a påår Schneeflockalan und zum Schluss håt ma gsehgn, wo die Sunne brupiert durch die Neblwolknen durchzumschliafn (werd ihrn åba kaum giliengen) - an klaan Spuziergång hienta uns gibrungen.
Eich ålln wientsch i heite an nettn, ruhign, bisiennlichen und erholsåmen Weihnåchtståg. Und wer's liaba laut, lustig und bitriebsåm måg, werd wohl iergendwo a Remmidemmi fiendn.
|
| ruflo am 24.12.2010 05:02 (vua 5446 Tåg) |
Kuhle, låss es regnen, werd schon wieda aufhearn. Und es Paradies kånn i dir leida niet schickn. Håt hålt jeda sei eigenes
Dånkscheen Eich ålln fier die vüln netten Weihnåchtswünsche und nochamål ållas Guate und a scheenes Fest! Bis murgn såg i Pfiateich und bleibz xund. |
| ruflo am 23.12.2010 17:28 (vua 5447 Tåg) |
Sodala, meine Weihnåchtsvurbereitungen håb i beendet und weil mir murgn bei unsre Kinder und Enkalan einglådn seind, wientsch i eich heit' schon
|
| ruflo am 23.12.2010 09:15 (vua 5447 Tåg) |
An guatn Morgen und an scheenen Donnerståg Eich ålln!
Zu meina gestrign Aufregung:
Jå, Bea håst Recht, åba wenn kaana niex sågg und ålle lei scheen stiellhåltn ... maanst werd siech nåachan wås ändern? De Åbhörprotokolle seind seit Jänna bikånnt. Hiatzt håmma ölf Monat späta. Und wås ies gschehgn? Und wås werd gschehgn?
A Kassierin, de a Semmale im eigenen Lådn fladert, weil se an Hunga håt, werd entlåssn und kummt in Tschumpus. A brumminenta Großkopfata reißt sich Hunderttausende untern Någl und waaß niet amål, fier wås er de kriagt und ångfressn wia der ies, håt er aa kaan Hunga niet. Und wås passiert dem? Es werd vamutet, dass er unschuldig ies.
Waaß iergendwer, wo in unsra Republick die Pananenblantaschn seind? Oda lebm mir eppa niet in aana ... ?
Es lebe Korruptziohn, Freinderlwiertschåft, Betrug und Bereicherung. I geh schpeibm. |
| ruflo am 22.12.2010 16:41 (vua 5448 Tåg) |
Tuat mir laad, dass i schon wieda amål bulüdisch werdn muaß, åba mie jucktz und bivur dass aus mein Herzlen a Mürdergruabm werd, muaß i's ausa låssn.
A håbbes des mietkriagt, wås då derzeitig bei uns in Esterreich laaft? Giheime Delepfohn-Åbhör-Prutallokohle. Naa sowås, hearst. Ies schohn a Sauarei, jå. I taatet sågn, sowås terfs niet gebm. Na.
Då miaßat die Unschuldigkeitzvamuhtigung eigntlieh so lång gölten, bies des nåhtlos ins Ende der Vajährungs-friesst iebergeht.
Naa, der årme KaHaGe miet sein Freinderl, ... De Stååtzånwåltnen, de håmt jå ieberhauptz kaa Mietleid niet miet senen. Sowås tuat man aanfåch niet. Und ållas zwengs de läppischn påår hundattausnd Nötsch... oda Mülliohnen ... Settene vadientn Diena des Volkes, de nur fier unsa Wohl gsurgt håbm, de miassatn eigntlieh IEBER dem ålln stehn und von solchene Håss-Aktziohnen von da Justitzia ausgnommen sein.
Wenn i mir vurstöll, dass iii als Giheimnissdräger miet mein Mietzalen hammlich aufn Henndi Delepfonier und sie fråg, wås i noch ållas vom Hoffaliedl haamzarrn soll... Unsähglieh, wenn dee in Wean ausafiendn tuamt, dass i schon wieda a påår Rollnen Glohpupier brauchn tua....
22.12.2010 16:42:Kuhle, muaßt hålt ginau schaugn, werst sehgn, seind Katzalan aa dabei. Jå. |
| ruflo am 22.12.2010 16:13 (vua 5448 Tåg) |
www.vada2002.homepage.eu/cody_89904089.html - a liaba Link fier Hunde-Kåtzn-und-sunstige-Viechafreinde.
Chrischtele, wenn die Kunickel und Låndschüldkrotnen und Fertalan und sowås Sålåt vatrågn, warum solls nåachan fier uns Leit schlächt sein? und Dosnsålåt (Iesndes und gips des? Oda maanst leicht Sawagraut, ha?) werntze hålt hiatzt håbm, weil es Gartle miet dem frieschn Sålåt zuagschniebm ies. Iess lei, und vatrau drauf, dass dee in da Kuahånstålt wiessn, wås se tuamt. Wientsch Dir an xundn und erholsåmen Aufenthålt. Und måch da niex draus, biest nit allaanig - da dock håt xågg, i bien aa a siaßes Kerlchen.
|
| ruflo am 22.12.2010 10:27 (vua 5448 Tåg) |
Is schon fåstbinåhe z'spåt zum Guatn-Morgen-Wienschn, åba i håb beim Dock ziemlich lång wårtn miassen. An scheenen Mittwoch kånn i eich åba schon noch wientschn.
Beale - auf die Zahntlen vom Kristkiendl taatet i niet z'vül Hoffnung setzn, weil i maan, des Kristkienlde håt jå noch Mülchzähnt. Nåachan kummt die Zåhntfee und niemmt sie da weck, då håst dånn die Bischärung. |
| ruflo am 21.12.2010 16:37 (vua 5449 Tåg) |
Also, dass es Mietzale die Tulpmen setzn tuat, des ies wohl lei a fälschlieha Ierdumm. De wo bei uns vur da Keischn bliahn tuamt, wenn se bliahn wöllnt, de håb nämmlieh iii in Bodn einegedruckt. Jå, iii bersönnlieh.
Es Mietzale håt lei gjaammat "Und ii terf wieda es Jåtach ausaziachn!" Und då håt sie iergendawia Rächt. Weil ållaweil, wenn es Jåtach daherschiaßt, tuamt mir meine Fiengerlen wuwa. I håb mir schon gidenkt, a so a Reißmatthias ies aa indelligente Krånkheit. De waaß ginau, wånn se kummen muaß. Hihi. |
| ruflo am 21.12.2010 09:30 (vua 5449 Tåg) |
Maaa ... scheen! Tulpmen! Und a Bösimiest taatet sågn: "Åba de håltnt hålt niet lång in da Wahsn!" Eh Wurscht - der solltet hålt settene aus Blastig nehmen, des håltet ehwieg, des Glumpp!
"Wenn der Friehling kummt, dann schenk ich Dier Tulpmen aus Aamsterdahm..." Wer håt denn des xungen, ha?
|
| ruflo am 21.12.2010 06:54 (vua 5449 Tåg) |
An guatn Morgen heit', am kierzestn Tåg des Jåhres. Es kummt zwår noch da kålte Wienta, åba es geht wieda aufwärtz. Mir taugt des, und Eich wåhrscheinlieh aa odawia? Die erstn Pålmkatzlen håb i beim Spazirngehn aa schon entdeckt. Falleicht kummt jå in drei Tåg es Ostahaasi und niet es Kriestkindle. Odawia?
Und an scheenen Dienståg wientsch i Eich aa noch dazua.
21.12.2010 07:22:Obdiemissmuss, Pfeiferle? Des ies niet lei Ob-die-Miss-muss oda ob sie niet muss, des ies a Såch im Kopf driennen. Wennst zum Beischpül auf da Stråßn dahienspazirst und es fliagt dir a Dåchziagl aufn Plutzer, und du dir denkst "Scheen guat, dass er getroffn håt!" - des ies Obdiemissmuss-pur.
Und die Gschiecht vom hålbvolln Bierglasl, wo a Bösimiest sågt "Des Glasl ies hålbat laar!" - des håt ieberhaupt niex miet Obdiemissmuss z'tuan, des ies lei a Bleedsinn. Weil wenn aana a hålbat volles Glasl miet Fiellaha drien stehn låsst und des niet safurt aussauft, nåachan ies er a depperter Depp. Jå.
Und wenn aana bei an Regnguss kaan Scherben niet håt und waschlnåss werd und nåachan noch sågt "Scheen guat, dass es niet ghåglt håt!" - i maan, der ies aa a biessale a Obdiemisst.
Und wenn aana mein vurign Eintråg liest und sågg "Scheen guat, dass in drei Tåg es Kristkiendle kummt und niet es Ostahaasi, weil des kånn seine Aja bihåltn!" - Der ies aa ... Jå, ginau.
Åba es ies hålt ållas a biessale relertif. Und a Obdiemisst werdn kånnst maan i niet, des biest von Giburt ån oda aa niet. Weil des fångt bei de Pämpas ån. Da aane gfreit siech, wenn er a Wierschtle ausedadruckt, da åndre siehgt lei die Beschährung.
|
| ruflo am 20.12.2010 11:02 (vua 5450 Tåg) |
Jå, Irmile und Fibi, bin wieda dahaam. Ållas in Puta - so hoff i.
Und naa - Beale, Ångst vur Nådln håb i kaane. Dazua håmtze mi schon z'oft gstupft und ångezapft. |
| ruflo am 20.12.2010 05:54 (vua 5450 Tåg) |
Seas, Pfeiferle. I bin heit' schon auf, weil i wieda amål ins Labor muaß (und då wer' i des, wås Du so gern siehgst - die Nådl - gånz sieha aa sehgn). Ies beessa, wenn i glei in da Fruah fåhr, weil späta muaß man maastns lång wårtn.
I wientsch Dein Fiam ållas Guate beim "Dockta Viech". I waaß, wås de årmen Hascherln durtn fier a Ångst håbm. Unsa Sally kriagt schon ållaweil des Ziettern, wenn mir in de Richtung mit ihrn fåhrn.
Guate Nåcht und schlåf trotzdem guat!
Ålln Åmderm wientsch i an guatn Morgen und an scheenen Start in die letzte Wochn vur Weinnåchtn.
|
| ruflo am 19.12.2010 08:31 (vua 5451 Tåg) |
Vierta Apfent - båld ies es so weit. Die Kinderlen können's eh schon fåst niamma dawårtn. Die Zeit vageht hålt nit und nit. Lei fier uns Ålte rennt sie dahien. Wia a Foglstrauß (åba Kopf-in-Sånd-steckn nutzt niex!) oda a Arabahengst.
Jåjå - håt jå schon da ålte Bertl xågg, der wo da gånzn Wölt die Zungen ausagreckt håt: Es ies ållas relertif. Aa die Zeit. Und de erst recht - schaug lei amål auf die Uhre und tua die Zaaga biobåchtn, wia se dahienkriachn, als wia a Schneck. Und schaug an Moment weck - schon seind die Minutnen vaflogn. Flutsch - und furt seindse.
Jå, so ies es miet da Relertifität. Und wenn ma in da Fruah munta werd und es tuan an Gilenke oda Haxn oda sunstwås relertif wenig weh, waaß man, man lebt noch. Wenn nix mehr wuwa tuat, ies man a Engale, oda a Teifale - jenåchdem, ies hålt aa relertif.
An guatn Morgen und an relertif scheenen viertn Apfentsunntåg wientsch i eich und såg "Pfiateich und Seas bies späta. Odaso."
|
|
|
|
|
