jåjå, mai, scheenes weetta, wårm werd's - von wegn! kaum wår amål da hiemml a biessale blau, schon ies es wieda biwölkt. und wia!
und wer ies schuld, ha? a so a geologische warzn miet nåmen "aja fladara" oda so ännliech. wullkahn, wullkahn - wenn i des schon hear kriag i die kriehse!... warum bischränkt siech denn des luada niet aufs aja fladern, muaß er åschn aa noch durch die gegend schpeibm, åschn de von isslånd bies zu uns her fliagt? håmma falleicht åschermittwoch odawia? und da nikilauda muaß siech gifftn, weil seine fliega in da kurasch bleibm miassn, niex geht mit göldvadeanen.
fier wås håt da hiemmlfåta der scheenen erdkugl settene grauslichn warznen aufegedruckt, wia er ållas erschåffn håt, ha, fier wås? mauntsänthällens, montpelleeh, ättna, wisuff und sette glumpp. jå, der wisuff ieberhaupts, der håt mit seina schpeibarei a gånze stådt - de wo bumpeji oda so ghaaßn håt - in da nåcht beim schnacksln dawuschn und mettahoch mit åschn zuagedeckt.
jå hearts, des geolognen, håbbes denn kaan stoppl, wo man in de degenen wullkahngrater einesteckn können taatet? åba wenn man so recht ieberlegn tuat - falleicht taatet des mit de stoppl går niet richtig funzn. denktz lei amål aufn krackatau - då håmtze wåhrscheinbår brupiert a stoppale einedruckn und wås wår, ha? in die hosn ies gången und die gånze iensl ies in die lufft gflogn. wia a fegele.
rawummm - oda krawuzikapuzi wia da kasperle sågg - und furt wår er, da krackatau. totall eggsblodiert. aha - eggs und aja - då muaß iergend a vabiendung sein odawia? zum ajafladara?
marandana, wenn de mir hintn in mein krater a stoppale einedruckn taatetn i maan i wuret aa so a årt krackatau oda sowås. påa, des taatet kleschn! krawuzikapuzi!!!
meingott bien i froh, dass da kloatznberg ka wullkahn nit ies und da tschecklnock aa niet und da kowesnock. und da mittågskogl schaugt von fiellah aus jå wohl aus wia a wullkahn - ies åba kaana. des ies aa guat.
jå, und bivur i vur lauta tschentschn vagiess:
an guatn morgen
und an scheenen tåg
eich ålln!
a jå, håb i noch an nåchtråg fier unsern wöltmaasta: kuhle schreib eine ins wertabiachl: a fliegakurasch ies a hänger.
20.05.2010 07:03:FIBILE iesnlosmitdirha? hoffntliech bist nit krånk? håmma schon sooooo lång niex mehr gheart von dir! wenn's dir niex guat geht: a guate besserung wientscht dir niet lei da krakatau - bleedsinn, da ruflo natierlich - sundern a die gånze bisåtzung vom fiellahanett.
